ژینا یەکەم قوربانیی سیاسەتە سەرکوتگەرانەکانی کۆماری ئیسلامیی نییە. ئەم ڕژیمە بە سەرکوت و توندوتیژیی و پەتی سێدارە گۆش کراوە. ڕژیم ئەمجارەشیان هەوڵیدا بە دوپاتکردنەوەی سیناریۆ کۆن و سواوەکانی، ڕاستیی ڕوداوەکە داپۆشی و بەرپرسیارەتیی ئەو قەتڵە بەئەنقەستە هەڵنەگرێت. هاوکات چاوەڕوانیی ئەوەشی نەدەکرد کە تێچووی ئەم جەنایەتەی هێندە گەورە و گران لەسەری بکەوێت.
گیانلەدەستدانی ژینا لە ژێر زەبروزەنگ و ئەشکەنجەی هێزە ئەمنییەتیی و چەکدارانی ڕژیم نەک هەر سەقز و کوردستان، بەڵکە دڵ و ویژدانی هەموو ئێران و زۆر شوێنی دیکەی جیهانیشی هەژاند. کوشتنی ژینا، ئیتر بابەت و کەیسێکی بچووکی ناوخۆیی نییە کە لەپشت دیواری گرتوخانەکاندا بەنەهێنیی و شاراوەیی بمێنێتەوە. هەواڵی کوشتنی ژینا زۆرخێراتر لەوەی چاوەڕوان دەکرا، سنووری سەقز و کوردستان و ئێرانی بڕی و ئەو جەنایەتە ئێستا پەڵەیەکی ڕەشی دیکەیە بەنێو چاوانی کۆماری ئیسلامیی ئێرانەوە کە چاوی هەموو خەڵکی دنیای لەسەرە.
هەربۆیە ڕژیم دەبێ باجی ئەو تاوانەی بدات. باجی ئەوتاوانە تەنیا یەخەی بکەرانی ناگرێتەوە و لەڕاستیدا سەرجەم بڕیاردەرانی لە نێو سەرانی ڕژیم و لەسەرویی هەمووشیانەوە خۆی عەلی خامنەییە دەگرێتەوە. خەڵکی کوردستان دەمێکە ئەو ڕاستییە دەزانن. لەڕاستیدا هەرلەیەکەم ڕۆژەکانی بەدەستەڵاتگەیشتنی ئەوڕژیمەوە، بێ هیچگومان و دڕدۆنگییەک، ناخ و ناوەرۆکی ئەوڕژیمەیان بەدروستیی ناسیی و وڵامی خۆیان پێیدایەوە. هەربۆیە بۆکوشتنی ژیناش ، نەک تەنیا بکرانی بەڵکە هەموو بناغە و جومگەکانی ڕژیم بە ڕێبەرەکەشیەوە دەکەنە ئامانجی دروشمەکانیان.
کوشتنی ژینا و ژیناکان، نەک هەر بەتەنیا کوشتنی مرۆڤێکی ژن، بەڵکە پەلامارێکە بۆ شکاندنی شکۆی فکری ئازاد و مرۆڤی ئازاد و جیهانی ئازد. هەرئەمانە بەتەینا هۆکاری تەواون بۆ ئەوەی کۆماری ئیسلامیی ناچار بکەین باجی ئەم تاوانەی بدات.
لەم قۆناغەی ئێستادا و بۆ تەنبێکردنی تاوانبارانی ڕژیمی ئیسلامیی و بۆ ئەوەی خۆیان و بەرکرێگیراوەکانیان نەخەڵەتابێن کەتەنانەت بۆ تاقەجارێکی دیکە بیرلە دەستدرێژیی بۆسەر ژیان و گیانی ژیناکان بکەنەوە، مانگرتن چەکێکی بەهێز و کاریگەرە. هەربۆیە ئەرکی ئینسانیی و نیشتیمانی هەموو تاک ۆ کۆیەکی گۆمەڵگایە کە ڕژی دووشەممە ٢٨ی خەرمانان بکەنە ڕۆژی تەنبێکردنی تاوانباران و بەگژداچوونەوەی کۆی نیزامی جەنایەتکار و دەستدرێژییکەری کۆماری ئیسلامیی ئێران.
ئێستا دیسانیش کاتی ئەوەیە کە هەموو تاکێکی کوردستان، بەپیر بانگەوازی مانگرتنی حیزبەکانی خۆیانەوە بچن وخاوەنداریەتیی گەل و حیزب و نیشتمانی خۆیان بکەن
